ସହିଦ ପୁଲିସକର୍ମୀଙ୍କ ପରିବାରକୁ ମିଳିବ ୨ କୋଟି ଟଙ୍କା
ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ କର୍ତ୍ତବ୍ୟ ପାଳନ ସମୟରେ ସହିଦ ହୋଇଥିବା ପୁଲିସ କର୍ମଚାରୀଙ୍କ ପାଇଁ ୨ କୋଟି ଟଙ୍କା କ୍ଷତିପୂରଣ ଘୋଷଣା କରିଛନ୍ତି। ଜାତୀୟ ପୁଲିସ ସ୍ମାରକୀ ଦିବସ ପାଳନ ପାଇଁ ଆୟୋଜିତ ଏକ କାର୍ଯ୍ୟକ୍ରମରେ ସେ ଏହି ଘୋଷଣା କରିଛନ୍ତି। ସେ ଏହା ମଧ୍ୟ ଘୋଷଣା କରିଛନ୍ତି ଯେ, ପୁଲିସ ବିଭାଗର ସମସ୍ତ ଖାଲି ପଦବୀ ୨୦୨୮ ସୁଦ୍ଧା ପୂରଣ କରାଯିବ।ସେ କହିଛନ୍ତି, ରାଜ୍ୟ ସରକାର ଆଇନ ଶୃଙ୍ଖଳା ବଜାୟ ରଖିବା ଉପରେ ପ୍ରାଥମିକତା ଦେଉଛନ୍ତି। ମୁଖ୍ୟମନ୍ତ୍ରୀ ଗୃହରକ୍ଷୀମାନଙ୍କ ପାଇଁ ଅନୁକମ୍ପା ରାଶି ୫ ଲକ୍ଷରୁ ୧୦ ଲକ୍ଷକୁ ବୃଦ୍ଧି କରିବାକୁ ମଧ୍ୟ ଘୋଷଣା କରିଛନ୍ତି। ଡିଏସପି ନିଯୁକ୍ତି ସମ୍ପର୍କରେ ଉଲ୍ଲେଖ କରି ମୁଖ୍ୟମନ୍ତ୍ରୀ କହିଛନ୍ତି ଯେ, ୧୧୦ ଡିଏସପି ପଦବୀରେ ନିଯୁକ୍ତି ତେଲେଙ୍ଗାନାର ଇତିହାସରେ ଏକ ଅଭୂତପୂର୍ବ ପଦକ୍ଷେପ।
ସେ ପୁଲିସ ଅଧିକାରୀମାନଙ୍କୁ ମହିଳା ଏବଂ ଶିଶୁମାନଙ୍କ ସହିତ ଜଡିତ ମାମଲାଗୁଡ଼ିକୁ ଅଧିକ ସମ୍ବେଦନଶୀଳତାର ସହିତ ପରିଚାଳନା କରିବାକୁ ଏବଂ ନ୍ୟାୟ ପ୍ରଦାନରେ ବିଳମ୍ବକୁ ଏଡାଇବାକୁ ନିବେଦନ କରିଛନ୍ତି। ଯୁବବର୍ଗଙ୍କୁ ନିଶାରୁ ରକ୍ଷା କରିବା ପାଇଁ ପ୍ରଭାବଶାଳୀ ପଦକ୍ଷେପ ନେବାକୁ ସେ ପୁଲିସକୁ ଅନୁରୋଧ କରିଛନ୍ତି। ସେମାନଙ୍କୁ ନିଶାଠାରୁ ଦୂରେଇ ରଖିବା ଏବଂ ସେମାନଙ୍କର ସୁରକ୍ଷା ସୁନିଶ୍ଚିତ କରିବା ଉପରେ ଗୁରୁତ୍ୱାରୋପ କରିବା ସହ ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି ଯେ, ରାଜ୍ୟ ସରକାର ଆଇନ ଶୃଙ୍ଖଳାକୁ ସୁଦୃଢ଼ କରିବା ଏବଂ ନାଗରିକଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ପ୍ରତିଶ୍ରୁତିବଦ୍ଧ।
