ବଢ଼ିପାରେ ମହାପ୍ରସାଦ ଦର!
ଶ୍ରୀକ୍ଷେତ୍ରକୁ ମହାପ୍ରଭୁଙ୍କ ଦର୍ଶନ ପାଇଁ ଯାଉଥିବା ଭକ୍ତଙ୍କ ପାଇଁ ଆସିପାରେ ଏକ ଚିନ୍ତାଜନକ ଖବର। ବଢ଼ିପାରେ ଶ୍ରୀମନ୍ଦିରର ମହାପ୍ରସାଦ ଦର! ଡାଲି, ଚାଉଳ, ପନିପରିବା ସମେତ ରୋଷେଇରେ ବ୍ୟବହୃତ ସାମଗ୍ରୀର ମୂଲ୍ୟ ବୃଦ୍ଧି ଏବେ ସୁଆର ସେବକଙ୍କ ଚିନ୍ତା ବଢ଼ାଇଛି। ଏହା ସହ ଓମଫେଡ୍ ଘିଅର ଦର ବୃଦ୍ଧି ମଧ୍ୟ ମହାପ୍ରସାଦ ପ୍ରସ୍ତୁତି ଖର୍ଚ୍ଚକୁ ପ୍ରଭାବିତ କରୁଥିବା କୁହାଯାଉଛି।ମହାପ୍ରସାଦ ପ୍ରସ୍ତୁତି ପାଇଁ ଆବଶ୍ୟକ ଡାଲି, ଚାଉଳ ଓ ପନିପରିବାର ଦର ବଢ଼ିବା ସହ ଘିଅର ମୂଲ୍ୟ ବୃଦ୍ଧି ରୋଷେଇ ଖର୍ଚ୍ଚକୁ ବଢ଼ାଇଛି। ଓମଫେଡ୍ ଘିଅର ଦର ନିକଟରେ ତିନିଥର ବଢ଼ିଥିବାରୁ ଶ୍ରୀମନ୍ଦିରରେ ମହାପ୍ରସାଦ ପ୍ରସ୍ତୁତ କରୁଥିବା ସୁଆର ସେବକମାନେ ଚିନ୍ତାରେ ପଡ଼ିଛନ୍ତି।ଏହି ପରିସ୍ଥିତିରେ ମହାପ୍ରସାଦର ଦର ବୃଦ୍ଧି ହୋଇପାରେ ବୋଲି ଚର୍ଚ୍ଚା ଜୋର ଧରିଛି। ତେବେ ଦର ବଢ଼ିବା ନେଇ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ସ୍ପଷ୍ଟ ହୋଇନାହିଁ।
ମହାପ୍ରସାଦର ଦର ବୃଦ୍ଧି ପ୍ରସଙ୍ଗରେ ସୁଆର ମହାସୁଆର ନିଯୋଗ ସହ ଆଲୋଚନା କରାଯାଇଥିବା ଶ୍ରୀମନ୍ଦିରର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ କହିଛନ୍ତି। ଅନ୍ୟପଟେ, ଭକ୍ତଙ୍କୁ ସୁଲଭ ମୂଲ୍ୟରେ ମହାପ୍ରସାଦ ଯୋଗାଇଦେବା ଉପରେ ଗୁରୁତ୍ୱ ଦିଆଯିବ ବୋଲି ସେ ସ୍ପଷ୍ଟ କରିଛନ୍ତି।ତେଣୁ ମହାପ୍ରସାଦର ଦର ବଢ଼ିବ କି ନାହିଁ, ତାହା ଆଗାମୀ ନିଷ୍ପତ୍ତି ଉପରେ ନିର୍ଭର କରୁଛି।ଆସନ୍ତା ସୋମବାରଠାରୁ କାର୍ତ୍ତିକ ମାସ ପାଇଁ ହଜାର ହଜାର ହବିଷ୍ୟାଳି ଶ୍ରୀକ୍ଷେତ୍ରରେ ଏକ ମାସ ଧରି ରହିବେ। ଏହି ସମୟରେ ମହାପ୍ରସାଦର ଚାହିଦା ବଢ଼ିବାର ଆଶା ରହିଛି। ଏପରି ସମୟରେ ଦର ବୃଦ୍ଧି ହେଲେ ଭକ୍ତ ଓ ହବିଷ୍ୟାଳିଙ୍କ ଉପରେ ଅଧିକ ଆର୍ଥିକ ବୋଝ ପଡ଼ିପାରେ।ମହାପ୍ରଭୁଙ୍କ ମହାପ୍ରସାଦ ପ୍ରତି ଭକ୍ତଙ୍କ ଭାବନା ଜଡ଼ିତ ଥିବାରୁ ଏହାର ଦର ବୃଦ୍ଧି ପ୍ରସଙ୍ଗ ଏବେ ଗୁରୁତ୍ୱ ବହନ କରୁଛି। ତେବେ ଭକ୍ତଙ୍କୁ ସୁଲଭ ମୂଲ୍ୟରେ ମହାପ୍ରସାଦ ମିଳିବ ନା ଦର ବଢ଼ିବ, ଏବେ ସମସ୍ତଙ୍କ ନଜର ଆଗାମୀ ନିଷ୍ପତ୍ତି ଉପରେ।
