ଲୋଗୋରୁ ହଟିଲା ଅଶୋକ ଚକ୍ର
ବଦଳିଲା ନ୍ୟାଶନାଲ ମେଡିକାଲ କମିଶନର ଲୋଗୋ । ଇଣ୍ଡିଆ ପରିବର୍ତ୍ତେ ଲେଖାଗଲା ଭାରତ। ଅଶୋକଚକ୍ର ହଟାଇ ରଖାଗଲା ହିନ୍ଦୁ ଦେବତାଙ୍କ ଫଟୋ। ରାଷ୍ଟ୍ରୀୟ ଚିକିତ୍ସା ଆୟୋଗ ବା ଏନଏମସି ନିଜ ଲୋଗ ପରିବର୍ତ୍ତନ କରିଛି। ଏଥିରେ ଏବେ ଇଣ୍ଡିଆ ପରିବର୍ତ୍ତେ ଭାରତ ଲେଖାଯାଇଛି। ଏଥିସହ ଆୟୁର୍ବେଦ ଦେବତା ଧନ୍ବନ୍ତରୀଙ୍କ ଏକ ରଙ୍ଗୀନ ଫଟୋ ଲଗାଯାଇଛି। ଏନଏମସିର ଏହି ପଦକ୍ଷେପକୁ ନେଇ ବିବାଦ ଦେଖାଦେଇଛି । ଏହାକୁ ନେଇ ଅଭିଯୋଗ କରାଯାଇଛି ଯେ ଦେଶର ଶୀର୍ଷ ଚିକିତ୍ସା ନିୟାମକ ସିଂହ ଓ ଅଶୋକ ଚକ୍ରକୁ ହଟେଇ ଦେଇଛନ୍ତି, ଯାହା ଆୟୋଗକୁ ପ୍ରତିନିଧିତ୍ୱ କରୁଥିବା ଫଟୋ ଭାବେ ପରିଚିତ ଥିଲା। ତେବେ ଏହାକୁ ନେଇ ଏନଏମସି କହିଛି, ଧନ୍ଵନ୍ତରୀଙ୍କ ଏକ କଳା ଧଳା ଫଟୋ ରେଖାଚିତ୍ର ଫଟୋ ଥିଲା ଯାହା ପୁରୁଣା ଲୋଗୋର ଅଂଶ ଥିଲା। ଏନଏମସିର କାର୍ଯ୍ୟବାହୀ ଅଧ୍ୟକ୍ଷ ବିଏନ ଗଙ୍ଗାଧର କହିଛନ୍ତି, ଏହା କୌଣସି ଗୁରୁତ୍ୱ ଥିବା ପରିବର୍ତ୍ତନ ନୁହେଁ। ଯାହାକୁ ନେଇ ଆଲୋଚନା ଲାଗି ରହିଛି। ଧନ୍ଵନ୍ତରୀଙ୍କ ଫଟୋ ପୂର୍ବରୁ ଲୋଗୋରେ ଥିଲା। ଏବେ ଏହାକୁ ରଙ୍ଗୀନ ଭାବରେ ଦର୍ଶାଯାଇଛି। ଏନଏମସି ଯେବେ ଗଠନ ହୋଇଥିଲା ସେତେବେଳେ ଧନ୍ବନ୍ତରୀଙ୍କ ଫଟୋ ବ୍ୟବହାର କରାଯାଉଥିଲା। ଭାରତରେ ସ୍ୱାସ୍ଥ୍ୟ ଓ ଚିକିତ୍ସା କ୍ଷେତ୍ରରେ ଧନ୍ଵନ୍ତରୀଙ୍କୁ ପୂଜା କରାଯାଇଥାଏ। ସର୍ବସମ୍ମତିକ୍ରମେ ଏପରି ନିଷ୍ପତ୍ତି ନିଆଯାଇଛି। ଇଣ୍ଡିଆ ପରିବର୍ତ୍ତେ ଆୟୋଗରେ ଭାରତର ନାମ ଯୋଡା ଯାଇଛି। କାରଣ ଦେଶ ଏହି ନାଁକୁ ଗୁରୁତ୍ୱ ଦେଇଛି। ଏହା ପଛରେ ଅନ୍ୟ କୌଣସି କାରଣ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
