ପରାଜୟ ପରେ ବିଦେଶରେ ବସି ପିଜ୍ଜା ଓ ମୋମୋ ଖାଇବେ ମୋଦି: ଲାଲୁ
ଆଗାମୀ ଲୋକସଭା ନିର୍ବାଚନରେ ପରାସ୍ତ ହେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଉ ତାପରେ ବିଦେଶରେ ବସବାସ କରିବା ପାଇଁ ସେ ଯୋଜନା କରୁଛନ୍ତି ବୋଲି ପରିହାସ କରି ଏହି ପ୍ରତିକ୍ରିୟା ରଖିଛନ୍ତି ‘ଆର୍ଜେଡି’ ମୁଖ୍ୟ ଲାଲୁ ପ୍ରସାଦ ଯାଦବ । ବିରୋଧୀ ଦଳଙ୍କ ପ୍ରତି ମୋଦୀଙ୍କ ‘ଭାରତ ଛାଡ଼’ ଟିପ୍ପଣୀ ଉପରେ ବିବୃତି ଦେବାକୁ କୁହାଯିବାରୁ ଲାଲୁ ପ୍ରସାଦ ଏହି ମନ୍ତବ୍ୟ ଦେଇଛନ୍ତି । ‘ଇଣ୍ଡିଆ’ ନାମରେ ନୂଆ ମେଣ୍ଟ ଗଢ଼ିଥିବା ବିରୋଧୀ ଦଳଙ୍କୁ ଅଳ୍ପ ଦିନ ତଳେ ଦୁର୍ନୀତିଗ୍ରସ୍ତ, ପରିବାରବାଦ ଓ ତୁଷ୍ଟିକରଣ ରାଜନୀତି ବୋଲି ପ୍ରଧାନମନ୍ତ୍ରୀ ମୋଦୀ କହିଥିଲେ। ପ୍ରଧାନମନ୍ତ୍ରୀଙ୍କୁ ସମାଲୋଚନା କରି ଲାଲୁ କହିଲେ, ମୋଦୀ ହିଁ ଭାରତ ଛାଡ଼ି ଚାଲିଯିବାକୁ ଯୋଜନା କରୁଛନ୍ତି…ସେହି କାରଣରୁ ହିଁ ସେ ଏତେ ଦେଶ ପରିଭ୍ରମଣ କରୁଛନ୍ତି । ଏହାପରେ ସେ ଶାନ୍ତିରେ ପିଜା, ମୋମୋ ଓ ଚୋମିନ୍ ଖାଇବା ଭଳି ଜାଗାଟିଏ ଖୋଜୁଛନ୍ତି। ‘ଆର୍ଜେଡି’ ସୁପ୍ରିମୋଙ୍କ ଏହି ମନ୍ତବ୍ୟ ଶୁଣି ଉପସ୍ଥିତ ଲୋକେ ହସିଉଠିଥିଲେ। ସୂଚନାଯୋଗ୍ୟ, ପରିସ୍ଥିତିକୁ ସାମାନ୍ୟ କରିବା ଲାଗି ହାସ୍ୟୋଦ୍ଦୀପକ ଟିପ୍ପଣୀ ଦେବାରେ ଲାଲୁଙ୍କର ସୁଖ୍ୟାତି ଅଛି।
