ଯାଜପୁରରେ ଚାଷୀ ଆତ୍ମହତ୍ୟା !
ପୁଣି ଋଣ ସୁଝିପାରିଲେନି ଚାଷୀ ।ଚାଷରେ କ୍ଷତି ହେବାରୁ ବିଷ ପିଇ କଲେ ଆତ୍ମହତ୍ୟା ! ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା ଧର୍ମଶାଳା ବ୍ଲକ ବାଜବାଟି ମୌଜାରେ। ମୃତ ଚାଷୀ ଜଣଙ୍କ ବାଜବାଟି ମୌଜାର ନିତ୍ୟାନନ୍ଦ ପରିଡା ହୋଇଥିବା ଜଣାପଡିଛି । ସୂଚନା ଅନୁସାରେ ନିତ୍ୟାନନ୍ଦ ବାଜବାଟି ମୌଜାରେ ଥିବା ୨ ଏକର ଜମିରେ ଋଣ କରି ଧାନଚାଷ କରିଥିଲେ। ସ୍ୱଳ୍ପ ବୃଷ୍ଟିପାତ ଓ ପଥର ଖାଦାନରେ ବ୍ଲାଷ୍ଟିଂ ଯୋଗୁଁ ଚାଷ ପ୍ରଭାବିତ ହୋଇଥିଲା ଏମିତିକି ଧାନ ଭଲ ହୋଇ ନଥିଲା । କିପରି ଋଣ ପୈଠ କରିବେ ଏନେଇ ନିତ୍ୟାନନ୍ଦ ଚିନ୍ତାରେ ଥିଲେ।
ଶନିବାର ପୁର୍ବାହ୍ନରେ ନିତ୍ୟାନନ୍ଦ ଧାନ ଜମିରେ କୀଟନାଶକ ପକାଇବା ପାଇଁ ଯାଇଥିଲେ। ଧାନ ଫସଲ ନଷ୍ଟ ହୋଇଥିବା ଦେଖି ସେ ବିଷ ପିଇ ଦେଇଥିବା ପରିବାର ଅଭିଯୋଗ ଆଣିଛନ୍ତି । ଧାନ ବିଲରେ ନିତ୍ୟାନନ୍ଦ ପଡ଼ିଥିବା ସ୍ଥାନୀୟ ଲୋକେ ଦେଖିଥିଲେ। ଏନେଇ ପରିବାର ଲୋକଙ୍କୁ ଖବର ଦେଇଥିଲେ। ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କାରି ଧର୍ମଶାଳା ଡାକ୍ତରଖାନାରେ ଭର୍ତି କରିଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ଗତକାଲି ତାଙ୍କର ମୃତ୍ୟୁ ଘଟିଥିଲା। ଏହାକୁ ନେଇ ସ୍ଥାନିୟରେ ଉତ୍ତେଜନା ଦେଖିବାକୁ ମିଳିଥିଲା ।
