ସୁନ୍ଦରଗଡ ବଡଗାଁରେ ହାତୀ ଆତଙ୍କ !
ପୁଣି ଜଣେ ବୃଦ୍ଧଙ୍କୁ କଚାଡି ମାରିଛି ହାତୀ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ସୁନ୍ଦରଗଡ଼ ଜିଲ୍ଲା ବଡ଼ଗାଁ ଫରେଷ୍ଟ ରେଞ୍ଜର ଟିମିନା କିଷାନ ପଡାରେ । ତେବେ ସୁନ୍ଦରଗଡରେ ବିଶେଷ କରି ବନ୍ୟଜନ୍ତୁଙ୍କ ଦୌରାତ୍ମ୍ୟ ଅଧିକ ଥିବା ବେଳେ କିଛି ଦିନ ହେବ ବଡଗାଁ ଅଞ୍ଚଳରେ ହାତୀ ଆତଙ୍କ ଦେଖିବାକୁ ମିଳିଥିଲା । ହାତୀ ଗାଁରେ ପଶି ଘର ଭାଙ୍ଗୁଥିବା ବେଳେ ଗୋଡ଼ାଇବାରୁ ବୃଦ୍ଧଙ୍କୁ ଶୁଣ୍ଢରେ ଉଠାଇ କଚାଡି ଦେଲା ଦନ୍ତା । ମୃତକ ଜଣଙ୍କ ବିପିନ ଟପୋ ହୋଇଥିବା ସୂଚନା ରହିଛି ।
ସୂଚନା ଅନୁସାରେ ଗତକାଲି ରାତିରେ ବିପିନ ଘରେ ଶୋଇଥିବା ସମୟରେ ଏକ ହାତୀ ଜଙ୍ଗଲରୁ ଆସି ବିପିନଙ୍କ ଘର ଭାଙ୍ଗୁଥିଲା। ବିପିନଙ୍କ ନିଦ ଭାଙ୍ଗିଯିବାରୁ ସେ ଘରୁ ବାହାରକୁ ଆସି ହାତୀଟିକୁ ଗୋଡ଼ାଇଥିଲେ। କିନ୍ତୁ ହାତୀଟି ବିପିନଙ୍କୁ ଶୁଣ୍ଢରେ ଉଠାଇ କଚାଡି ଦେଇଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଗତକାଲି ମଧ୍ୟ ସବଡେଗା ଟାଙ୍ଗରଗାଁରେ ହାତୀ ଆକ୍ରମଣରେ ଜଣେ ବୃଦ୍ଧାଙ୍କ ମୃତ୍ୟୁ ଘଟିଥିଲା। ଏହାସହ ଗାଁରେ ଆଉ ୫ ଜଣଙ୍କ ଘର ଭାଙ୍ଗି ଦେଇଛି ଦନ୍ତା। ବାରମ୍ବାର ହାତୀ ଗାଁ ଭିତରକୁ ପଶିଆସି ଲୋକଙ୍କୁ ଆକ୍ରମଣ କରିବା ସହ ଘର ଭାଙ୍ଗି ଦେଉଥିବା ନେଇ ଗ୍ରାମବାସୀ ଅଭିଯୋଗ କରିଥିବା ବେଳେ ବନବିଭାଗର କାର୍ଯ୍ୟଦକ୍ଷତା ନେଇ ଉଠିଛି ବଡ ପ୍ରଶ୍ନବାଚୀ । ଯାହାକୁ ନେଇ ସ୍ଥାନିୟରେ ଅସନ୍ତୋଷ ମଧ୍ୟ ଦେଖିବାକୁ ମିଳିଛି ।
