କଲିକତାରୁ ଓଡ଼ିଶା ଆସିବା ବେଳେ ଚଳନ୍ତା ବସରେ ଅଗ୍ନିକାଣ୍ଡ , ମହିଳା ଜୀବନ୍ତ ଦଗ୍ଧ !
ଚଳନ୍ତା ବସରେ ଭୟଙ୍କର ଅଗ୍ନିକାଣ୍ଡ । ଯାହାର ଚିତ୍ର ଅତ୍ୟନ୍ତ ଭୟଙ୍କର । କୋଲକାତା ବାବୁଘାଟରୁ ପାରାଦୀପ ଆସୁଥିବା ଏକ ଯାତ୍ରୀବାହୀ ବସରେ ହଠାତ ନିଆଁ ଲାଗିଯିବା ଫଳରେ ଜଣେ ମହିଳା ଜୀବନ୍ତ ଦଗ୍ଧ ହୋଇଯାଇଥିବା ସୂଚନା ରହିଛି । ତେବେ ଅଗ୍ନିକାଣ୍ଡରେ କେନ୍ଦ୍ରାପଡା ମାର୍ଶାଘାଇ ବ୍ଲକର ନୋଳିଆ ଚକରପୁ ଗାଁର ପୁଷ୍ପଲତା ଦାସଙ୍କ ମୃତ୍ୟୁ ହୋଇଥିବା ଖବର ସାମ୍ନାକୁ ଆସିଛି । ସୂଚନା ଅନୁସାରେ, ଗତକାଲି ଶିବମ ବସ ପାରାଦୀପ ଆସୁଥିବା ବେଳେ, ରାତି ପାଖାପାଖି ୯ଟା ପରେ ଏହି ଭୟଙ୍କର ଅଗ୍ନିକାଣ୍ଡ ଘଟିଥିଲା । ଖଡଗପୁର ନିକଟ ଜାତୀୟ ରାଜପଥରେ ଜଳି ଯାଇଥିଲା । ବସରେ ଥିବା କିଛି ଯାତ୍ରୀ ଖାଇବା ପରେ ଶୋଇପଡ଼ିଥିଲେ । ଏହି ସମୟରେ ବସର ଇଂଜିନ୍ ପାଖରୁ ନିଆଁ ବାହାରିଥିଲା । କିଛି ସମୟ ମଧ୍ୟରେ ପୂରା ବସ୍ ଧୂଆଁ ହୋଇଯାଇଥିଲା ।
ଏହା ପରେ ବସରେ ଥିବା ଯାତ୍ରୀ ଚିକ୍ରାର କରିବା ଆରମ୍ଭ କରିଥିଲେ । ବସରେ ମୋଟ ୫୮ ଜଣ ଯାତ୍ରୀ ଥିଲେ । ହଠାତ ନିଆଁ ଲାଗିବା ଜାଣିବା ପରେ ଭୟଭୀତ ହୋଇ ପଡିଥିଲେ ଯାତ୍ରୀ । ତେବେ ହଠାତ ବସରେ କେମିତି ଲାଗିଲା ନିଆଁ । ଅଗ୍ନିକାଣ୍ଡ ବେଳର ଛାତିଥରା କାହାଣୀ କହିଲେ ସୁରକ୍ଷିତ ଫେରିଥିବା ଯାତ୍ରୀ । ଯାତ୍ରୀମାନେ ବସର ଝରକା ଓ ପଛ କବାଟ ଭାଙ୍ଗି ବାହାରକୁ ପଳାଇ ଆସିଥିଲେ । ଓଡ଼ିଶାରୁ ଯାଇଥିବା ଯାତ୍ରୀମାନେ ବ୍ୟବସାୟ ପାଇଁ କୋଲକାତା ଯାଇଥିଲେ । ହେଲେ ବସ୍ ନିଆଁରେ ସେମାନଙ୍କ ସମସ୍ତ ସାମଗ୍ରୀ ପୋଡି ହୋଇଯାଇଛି । ଏହି ଯାତ୍ରୀମାନଙ୍କୁ ସୁରକ୍ଷିତ ଆଣିବା ପାଇଁ ବାଲେଶ୍ୱର ଜିଲ୍ଲା ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଇଥିଲା । ତେବେ ଯାହାର ଏବେ ତଦନ୍ତ କରାଯାଉଥିବା ଦେଖିବାକୁ ମିଳିଛି ।
