‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପୁଣି କ୍ଷମା ମାଗିବାକୁ ପଡ଼ିବ’
ବିଜେପି ଏମପି ତଥା ବଲିଉଡ ଅଭିନେତ୍ରୀ କଙ୍ଗନା ରଣାୱତଙ୍କ ଚାଷୀଙ୍କ ଉପରେ ମନ୍ତବ୍ୟ ପରେ ରାଜନୈତିକ ବୟାନବାଜି ବନ୍ଦ ହେବାର ନାଁ ନେଉନାହିଁ। କଂଗ୍ରେସ ଲଗାତାର ଅଭିଯୋଗ ଲଗାଉଛି ଯେ ଭାଜପା ପୁଣିଥରେ କୃଷକଙ୍କ ଉପରେ ତିନି କୃଷି ଆଇନ ଲଗାଇବାକୁ ଯାଉଛି। କଂଗ୍ରେସ ଏମପି ରାହୁଲ ଗାନ୍ଧୀ ଏକ୍ସ’ରେ ଏକ ଭିଡିଓ ପୋଷ୍ଟ କରି କହିଛନ୍ତି, “ସରକାରଙ୍କ ନୀତିର କିଏ ନିଷ୍ପତ୍ତି ନେଉଛି? ଜଣେ ବିଜେପି ଏମପି କିମ୍ବା ପ୍ରଧାନମନ୍ତ୍ରୀ ମୋଦୀ?
ବିଜେପି ଉପରେ ଅଭିଯୋଗ ଲଗାଇ ରାହୁଲ କହିଛନ୍ତି, ୭୦୦ ରୁ ଅଧିକ କୃଷକ, ବିଶେଷ କରି ହରିୟାଣା ଏବଂ ପଞ୍ଜାବରୁ ଅଧିକ ଲୋକେ ସହିଦ ହେବା ପରେ ମଧ୍ୟ ଭାଜପାର ମନ ଭରିନାହିଁ। କିନ୍ତୁ ଇଣ୍ଡିଆ ଗଠବନ୍ଧନ କୃଷକଙ୍କ ବିରୋଧରେ କୌଣସି ଷଡଯନ୍ତ୍ରକୁ ସଫଳ ହେବାକୁ ଦେବ ନାହିଁ – ଯଦି ଚାଷୀଙ୍କୁ କ୍ଷତି ପହଞ୍ଚାଇବାକୁ ପଦକ୍ଷେପ ନିଆଯାଏ ତେବେ ମୋଦିଜୀଙ୍କୁ କ୍ଷମା ମାଗିବାକୁ ପଡ଼ିବ। ”
ଏହାପୂର୍ବରୁ ବିଜେପି ଲୋକସଭା ଏମପି କଙ୍ଗନା ରଣାୱତ କହିଥିଲେ ଯେ ତିନୋଟି କୃଷି ଆଇନକୁ ଫେରାଇ ଆଣିବା ଉଚିତ ଏବଂ କୃଷକମାନେ ନିଜେ ଏହା ଦାବି କରିବା ଉଚିତ୍। ତେବେ ତାଙ୍କର ଏହି ବିବୃତ୍ତିକୁ ଭାଜପାର ସହଯୋଗୀ ଦଳ ମଧ୍ୟ ବିରୋଧ କରିଥିଲା, ଏହା ପରେ କଙ୍ଗନାଙ୍କୁ ତାଙ୍କ ବିବୃତ୍ତି ପ୍ରତ୍ୟାହାର କରିବାକୁ ପଡିଥିଲା। ପରେ ସାଂସଦ କଙ୍ଗନା ରଣାୱତ କହିଛନ୍ତି ଯେ ଏହା ତାଙ୍କର ବ୍ୟକ୍ତିଗତ ମତ ଏବଂ ଦଳର ଏହା ସହ କୌଣସି ସମ୍ପର୍କ ନାହିଁ।
