ପରୀକ୍ଷା ପୂର୍ବରୁ ଆତ୍ମହତ୍ୟା ନା ହତ୍ୟା?
ପରୀକ୍ଷା ଆଗରୁ କାହିଁକି ଝୁଲି ପଡିଲେ ଛାତ୍ର I ପରୀକ୍ଷା ଚାପ ନା କର୍ତ୍ତୃପକ୍ଷଙ୍କ ପ୍ରେସର୍ ଯୋଗୁଁ ଜୀବନ ହାରିଲେ I ନିଜେ ଆତ୍ମହତ୍ୟା କଲେ ନା ତାଙ୍କୁ କିଏ ମାରି ଟାଙ୍ଗୀ ଦେଲା I ମାଟ୍ରିକ୍ ପଢୁଆ ପିଲାର ସନ୍ଦେହଜନକ ମୃତ୍ୟୁ ନେଇ ଏଭଳି ଅନେକ ଅସମାହିତ ପ୍ରଶ୍ନ ଉଙ୍କି ମାରୁଛି I ବଲାଙ୍ଗିର କାମାକ୍ଷିନଗର ବିଶ୍ବାତ୍ମା ବିଦ୍ୟାମନ୍ଦିର ସ୍କୁଲ ହଷ୍ଟେଲ ବାଥରୁମରୁ ମାଟ୍ରିକ୍ ଛାତ୍ରଙ୍କ ମୃତଦେହ ଉଦ୍ଧାର ହୋଇଛି I ମୃତ ଛାତ୍ର ଜଣକ ହେଲେ ତଲିଉଡ଼ାର ଗାଁର ବିନାୟକ ପ୍ରଧାନ I ସ୍କୁଲ ହଷ୍ଟେଲରେ ରହି ପାଠ ପଢୁଥିବା ବିନାୟକ ଜଣେ ମେଧାବୀ ଛାତ୍ର ଥିଲେ I ପରୀକ୍ଷା ଥିବାରୁ ଗତ ରବିବାର ତାଙ୍କ ବାପା ତାଙ୍କୁ ଦେଖିବାକୁ ଆସିଥିଲେ I ସେ କୌଣସି ଚାପରେ ନଥିବା ସହ ପରୀକ୍ଷାରେ 95 ପ୍ରତିଶତ ମାର୍କ ଆସିବ ବୋଲି ତାଙ୍କ ବାପା କହିଥିଲେ I ହେଲେ ବାଥରୁମରେ ଝୁଲି ପଡ଼ିବା ଘଟଣାକୁ ସହଜରେ ଗ୍ରହଣ କରି ପାରୁ ନାହାନ୍ତି ପରିବାର ଲୋକେ I ତାଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ମୃତ ଛାତ୍ରଙ୍କ ପିତାମାତା I ଏବଂ ଘଟଣାର ସଠିକ ତଦନ୍ତ କରି ଦୋଷୀ ବିରୋଧରେ କଡା କାର୍ଯାନୁଷ୍ଠାନ ନେବାକୁ ଦାବି କରିଛନ୍ତି I
