ଏଯାଏଁ ଉପାସରେ ଅଛନ୍ତି ମହାବାହୁ !
ମହାପ୍ରଭୁଙ୍କ ନୀତିକାନ୍ତିରେ ମହାବିଭ୍ରାଟ । ଏଯାଏଁ ଆରମ୍ଭ ହୋଇନି ସେବା ପୂଜା । ଶ୍ରୀମନ୍ଦିରରେ ସେବାୟତଙ୍କ ମଧ୍ୟରେ ବିବାଦ ଯୋଗୁଁ ଉପାସରେ ଶ୍ରୀଜିଉ । ଉଛଣା ଅନୁସାରେ ସେବାରୁ ନିବୃତ ଥିବା ଜଣେ ସିଂହାରୀ ସେବାୟତ ଆଜି ମହାପ୍ରଭୁଙ୍କ ମଙ୍ଗଳ ଆଳତି କରିଥିଲେ । ଯାହାକୁ ନେଇ ବିବାଦ ଆରମ୍ଭ ହୋଇଥିଲା । ଏହାପରେ ବିବାଦ ବଢିବାରୁ ହସ୍ତକ୍ଷେପ କରିଥିଲା ଶ୍ରୀମନ୍ଦିର ପ୍ରଶାସନ । ତଥାପି ନିଜ ଜିଦରୁ ଅଟଳ ରହିଛନ୍ତି ସେବାୟତ । କାହିଁକି ନିଲମ୍ବିତ ସେବାୟତ ମହାପ୍ରଭୁଙ୍କ ପାଖରେ ଆଳତି କଲେ ତାର ଉତ୍ତର ରଖିବା ସହ ମହାପ୍ରଭୁଙ୍କୁ ବଡ଼ ମହାସ୍ନାନ କରାଗଲା ପରେ ଯାଇ ନୀତି ବଢ଼ିବ ବୋଲି ଅନ୍ୟ ସେବାୟତ ଜିଦ୍ ଧରିଛନ୍ତି ।
ନୀତିକାନ୍ତିରେ ଶୃଙ୍ଖଳା ଆଣିବା ପାଇଁ ଶ୍ରୀମନ୍ଦିରରେ ସେବାୟତଙ୍କ ସହ ନୀତି ପ୍ରଶାସକଙ୍କ ଆଲୋଚନା ହୋଇଛି । ମଇଲମ ପରେ ଏବେବି ବନ୍ଦ ଅଛି ନୀତିକାନ୍ତି । ଖବର ଅନୁଯାୟୀ ନିଲମ୍ବିତ ସେବାୟତ ଜଣଙ୍କ ଅନ୍ୟଜାତିରେ ବିବାହ କରିଥିବାରୁ ମହାପ୍ରଭୁଙ୍କ ସେବା ପୂଜାରୁ ସିଂହାରୀ ସେବାୟତ ସଂଘମିଶ୍ର ସିଂହାରୀଙ୍କୁ ବଞ୍ଚିତ କରାଯାଇଥିଲା । ଯାହା ପାଇଁ ନିଯୋଗ ପକ୍ଷରୁ ତାଙ୍କୁ ନିଲମ୍ବିତ କରାଯାଇଥିଲା । ହେଲେ ଆଜି ସକାଳୁ ସକାଳୁ ନିଲମ୍ବିତ ସିଂହାରୀ ସେବାୟତ ଯାଇ ମହାପ୍ରଭୁଙ୍କ ସେବା ପୂଜା କରିଥିଲେ । ଯାହାକୁ ବିରୋଧ କରିଥିଲେ ଅନ୍ୟ ସେବାୟତ । ଯାହାକୁ ନେଇ ଏବେ ମହାପ୍ରଭୁଙ୍କ ନୀତିରେ ଦେଖାଦେଇଛି ବିଳମ୍ବ ।
