ଗଞ୍ଜେଇ ଜବତ କରିବାକୁ ଯାଇ ମାଫିଆଙ୍କ ଶିକାର ହେଲା ପୋଲିସ। ଆଇଆଇସି ଓ କନଷ୍ଟେବଲଙ୍କୁ ଗୋଡ଼ାଇ ଗୋଡ଼ାଇ ହାଣିଲେ ଗଞ୍ଜେଇ ମାଫିଆ। ଗଞ୍ଜେଇ ମାଫିଆଙ୍କ ସଂଘବଦ୍ଧ ଆକ୍ରମଣରେ ଅବକାରୀ ଆଇଆଇସି ସହ ୨ ଜଣ କନଷ୍ଟେବଲ ଗୁରୁତର ଆହତ ହୋଇଛନ୍ତି। ଏଭଳି ଘଟଣା ଘଟିଛି କୋରାପୁଟ ଜିଲ୍ଲା କୋଟପାଡ଼ ଥାନା ଘୋଡ଼ାହାଡ଼ ଗାଁରେ । ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିବା ସୂଚନା ରହିଛି ।
ତେବେ ସୂଚନା ଅନୁଯାୟୀ ଗତକାଲି ରାତିରେ ଗଞ୍ଜେଇ କାରବାର ହେଉଥିବା ଏକ ବିଶେଷ ସୂତ୍ରରୁ ଖବର ପାଇଥିଲା ପୋଲିସ। କୋଟପାଡ ଓ ବୋରିଗୁମ୍ମାର ଅବକାରୀ ଟିମ୍ ମିଳିତ ଭାବେ ଘୋଡାଘାଟ ଗାଁ ଓ ନିକଟସ୍ଥ ଜଙ୍ଗଲରେ ଚଢ଼ାଉ କରିଥିଲେ। ତିନୋଟି ଟିମ୍ ବିଭିନ୍ନ ସ୍ଥାନରେ ଛକି ରହି ମାଫିଆଙ୍କୁ ଧରିବା ଲାଗି ଜାଲ ପ୍ଳାନ କରିଥିଲେ । ଦୁଇ ଟିମ୍ ଗାଁରେ ଚଢ଼ାଉ କରିଥିବା ବେଳେ ଅନ୍ୟ ଏକ ଟିମ୍ ଜଙ୍ଗଲରେ ଚଢ଼ାଉ କରିଥିଲେ। ତେବେ ଜଙ୍ଗଲ ଭିତରେ ଚଢାଉ ବେଳେ ପ୍ରତି ଆକ୍ରମଣ କରିଥିଲେ ମାଫିଆ।
୨୫ରୁ ଅଧିକ ଗଞ୍ଜେଇ ମାଫିଆ ପ୍ରଥମେ ଠେଙ୍ଗା, ଖଣ୍ଡା, ଭୁଜାଲି ଓ ବନ୍ଧୁକ ଦେଖାଇ ଅବକାରୀ କର୍ମଚାରୀଙ୍କ ଭୟଭୀତ କରିଥିଲେ। ପରେ ଗଞ୍ଜେଇ ମାଫିଆମାନେ ଖଣ୍ଡାରେ ଅବକାରୀ ଆଇଆଇସି ଓ ୨ କନଷ୍ଟେବଲଙ୍କୁ ଆକ୍ରମଣ କରିଥିଲେ। କୌଶଳ କରି ସ୍ଥାନ ଛାଇ ପଳାଇ ଆସିଥିଲେ ଆହତ ପୋଲିସ କର୍ମଚାରୀ। ଏହାପର ତୁରନ୍ତ ଡାକ୍ତରଖାନାରେ ଭର୍ତ୍ତି ହୋଇଥିବା ବେଳେ ସ୍ବାସ୍ଥ୍ୟବସ୍ଥା ସ୍ଥିର ଥିବା ସୂଚନା ରହିଛି । ଅନ୍ୟପଟେ ଆକ୍ରମଣକାରୀଙ୍କୁ ଧରିବାରେ ସଫଳ ହୋଇନି ପୋଲିସ ।
