୨୦୦୬ ମୁମ୍ବାଇ ଟ୍ରେନ ବିସ୍ଫୋରଣ ମାମଲା: ୧୧ ଅଭିଯୁକ୍ତ ନିର୍ଦ୍ଦୋଷରେ ଖଲାସ
୨୦୦୬ରେ ଘଟିଥିବା ମୁମ୍ବାଇ ଲୋକାଲ୍ ଟ୍ରେନ୍ ବିସ୍ଫୋରଣ ମାମଲାରେ ଐତିହାସିକ ରାୟ ଶୁଣାଇଛନ୍ତି ବମ୍ବେ ହାଇକୋର୍ଟ । ଦୀର୍ଘ ୧୯ ବର୍ଷ ପରେ ଆସିଲା ରାୟ । ଏହି ମାମଲାରେ ନିମ୍ନ ଅଦାଲତ ଦ୍ୱାରା ଦୋଷୀ ସାବ୍ୟସ୍ତ ୧୨ ଜଣ ଅଭିଯୁକ୍ତଙ୍କ ମଧ୍ୟରୁ ୧୧ ଜଣଙ୍କୁ ହାଇକୋର୍ଟ ମୁକ୍ତ କରିଛନ୍ତି । ଅଭିଯୁକ୍ତଙ୍କ ମଧ୍ୟରୁ ଜଣେ ଆବେଦନ ପ୍ରକ୍ରିୟା ସମୟରେ ମୃତ୍ୟୁବରଣ କରିଥିଲେ ।ହାଇକୋର୍ଟଙ୍କ ଖଣ୍ଡପୀଠ ତାଙ୍କ ରାୟରେ କହିଛନ୍ତି ଯେ, ମାମଲାରେ ଉପସ୍ଥାପିତ ପ୍ରମାଣ ନିର୍ଭରଯୋଗ୍ୟ ନୁହେଁ । ଅନେକ ସାକ୍ଷୀଙ୍କ ସାକ୍ଷ୍ୟ ସନ୍ଦେହ ଘେରରେ ଥିଲା ।
କୋର୍ଟ ଏହା ମଧ୍ୟ ସ୍ୱୀକାର କରିଛନ୍ତି ଯେ, ଅଭିଯୁକ୍ତମାନଙ୍କୁ ବଳପୂର୍ବକ ପଚରାଉଚରା କରାଯାଇଥିଲା ଏବଂ ସେମାନଙ୍କର ବୟାନ ନିଆଯାଇଥିଲା, ଯାହା ଆଇନଗତ ଭାବରେ ବୈଧ ନୁହେଁ ।ଅଦାଲତ କହିଛନ୍ତି ଯେ, ଅଭିଯୁକ୍ତଙ୍କ ବିରୁଦ୍ଧରେ ଉପସ୍ଥାପିତ ପ୍ରମାଣରେ ଗମ୍ଭୀର ତ୍ରୁଟି ରହିଥିଲା । TI ପରେଡ୍କୁ ଚ୍ୟାଲେଞ୍ଜ କରିବା ପାଇଁ ପ୍ରତିରକ୍ଷାର ଯୁକ୍ତିକୁ ଯଥାର୍ଥ ବୋଲି ବିବେଚନା କରାଯାଇଥିଲା । କିଛି ସାକ୍ଷୀ ବର୍ଷ ବର୍ଷ ଧରି ନୀରବ ରହିଲେ ଏବଂ ତା’ପରେ ହଠାତ୍ ଅଭିଯୁକ୍ତଙ୍କୁ ଚିହ୍ନଟ କଲେ । ଯାହା ଅବିଶ୍ବାସ ସୃଷ୍ଟି କରିଥିଲା ।
ପୂର୍ବରୁ ଅନେକ ସାକ୍ଷୀ ସମାନ ମାମଲାରେ ହାଜର ହୋଇଥିଲେ, ଯାହା ସେମାନଙ୍କ ବିଶ୍ୱସନୀୟତା ଉପରେ ପ୍ରଶ୍ନ ଉଠାଇଥିଲା ।ସୂଚନାଯୋଗ୍ୟ, ୨୦୦୬ରେ ଜୁଲାଇ ୧୧ ତାରିଖରେ ମୁମ୍ବାଇ ଲୋକାଲ ଟ୍ରେନରେ ୧୧ ମିନିଟ ଭିତରେ ୭ଟି ସ୍ଥାନରେ ବିସ୍ଫୋରଣ ହୋଇଥିଲା । ମୁମ୍ବାଇ ବିସ୍ଫୋରଣରେ ୧୮୯ ଜଣଙ୍କ ମୃତ୍ୟୁ ସହିତ ୮୨୭ ଜଣ ଯାତ୍ରୀ ମଧ୍ୟ ଗୁରୁତର ଆହତ ହୋଇଥିଲେ । ୧୧ ଜୁଲାଇରେ ମାତ୍ର ୧୧ ମିନିଟରେ ୭ଟି ବିସ୍ଫୋରଣ ହୋଇଥିଲା । ସେସନ୍ସ କୋର୍ଟର ନିଷ୍ପତ୍ତି ପରେ ଅଭିଯୁକ୍ତମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ, ଯେଉଁଠାରେ ସେମାନଙ୍କୁ ନିର୍ଦ୍ଦୋଷ ଘୋଷଣା କରାଯାଇଥିଲା ।
