୨୪ଘଣ୍ଟାରେ ୧୫ଥର ଭୂକମ୍ପ
ମିଆଁମାର ଏବଂ ଥାଇଲାଣ୍ଡରେ ସଂଘଟିତ ପ୍ରଳୟଙ୍କରୀ ଭୂକମ୍ପରେ ବ୍ୟାପକ କ୍ଷୟକ୍ଷତି ଘଟିବା ସହ ମୃତ୍ୟୁସଂଖ୍ୟା ୧,୬୦୦ ଟପିଛି। ବିଲ୍ଡିଂଗୁଡ଼ିକର ଭଗ୍ନାବଶେଷ ତଳୁ ଅଧିକ ସଂଖ୍ୟାରେ ମୃତଦେହ ମିଳିବାରେ ଲାଗିଥିବାରୁ ମୃତ୍ୟୁସଂଖ୍ୟା ଆହୁରି ବଢ଼ିବା ଆଶଙ୍କା କରାଯାଉଛି। ମ୍ୟାନ୍ମାରର ସାମରିକ ସରକାରଙ୍କ ସୂଚନା ଅନୁଯାୟୀ, ଶନିବାର ସୁଦ୍ଧା ୧,୬୪୪ ମୃତଦେହ ମିଳିବା ସହ ୩,୪୦୦ ଜଣ ଆହତ ହୋଇଛନ୍ତି। ଏହାବ୍ୟତୀତ ୩୦ ଜଣ ନିଖୋଜ ଥିବା ଜଣାପଡ଼ିଛି। ଭୂକମ୍ପ କ୍ଷତିଗ୍ରସ୍ତଙ୍କ ପାଇଁ ବିଭିନ୍ନ ଦେଶରୁ ରିଲିଫ୍ ସହାୟତା ପହଞ୍ଚିବାରେ ଲାଗିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ମିଆଁମାର ସାମରିକ ସରକାରଙ୍କ ମୁଖ୍ୟ ମିନ୍ ଔଙ୍ଗ୍ ହ୍ଲାଇଙ୍ଗ୍ଙ୍କ ସହ କଥା ହୋଇଛନ୍ତି। ଭୂକମ୍ପ ବିପର୍ଯ୍ୟସ୍ତ ମିଆଁମାର ଜନସାଧାରଣଙ୍କୁ ସେ ଭାରତ ତରଫରୁ ସମବେଦନା ଜଣାଇବା ସହ ସବୁ ପ୍ରକାର ସମ୍ଭାବ୍ୟ ସହାୟତା ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଏହି କଠିନ ସମୟରେ ଭାରତ ମ୍ୟାନ୍ମାର ଲୋକଙ୍କ ସମର୍ଥନରେ ଛିଡ଼ା ହୋଇଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଉଦ୍ଧାର କାର୍ଯ୍ୟରେ ସହାୟତା ପାଇଁ ଭାରତ ଜାତୀୟ ବିପର୍ଯ୍ୟୟ ପ୍ରଶମନ ବଳ (ଏନ୍ଡିଆର୍ଏଫ୍)ର ୮୦ ଜଣିଆ ଟିମ୍ ପଠାଇଛି। ଭାରତ ପକ୍ଷରୁ ‘ଅପରେଶନ ବ୍ରହ୍ମା’ ନାମରେ ଭୂକମ୍ପ କ୍ଷତିଗ୍ରସ୍ତ ମିଆଁମାର ଓ ଥାଇଲାଣ୍ଡକୁ ରିଲିଫ୍ ସହାୟତା ପଠାଯାଇଛି। ବାୟୁସେନାର ସି୧୩୦ଜେ ସାମରିକ ପରିବହନ ବିମାନ ଜରିଆରେ ମିଆଁମାରର ୟାଙ୍ଗୁନ୍କୁ ୧୫ ଟନ୍ ରିଲିଫ୍ ସାମଗ୍ରୀ ପଠାଯାଇଛି। ଏଥିରେ ଟେଣ୍ଟ, ସ୍ଲିପିଂ ବ୍ୟାଗ୍, କମ୍ବଳ, ପ୍ରସ୍ତୁତ ଖାଦ୍ୟ, ଜଳ ବିଶୋଧକ, ସୋଲାର ଲ୍ୟାମ୍ପ୍, ଜେନେରେଟର ସେଟ୍ ଏବଂ ଅତ୍ୟାବଶ୍ୟକ ଔଷଧ ରହିଛି। ବାୟୁସେନାର ଆଉ ୨ଟି ବିମାନରେ ରିଲିଫ୍ ସାମଗ୍ରୀ ଖୁବ୍ଶୀଘ୍ର ହିଣ୍ଡନ ବାୟୁସେନା ଷ୍ଟେଶନରୁ ମିଆଁମାରକୁ ପଠାଯିବ। ଏହା ବ୍ୟତୀତ ନୌସେନାର ୨ଟି ଜାହାଜ ଆଇଏନ୍ଏସ୍ ସାତପୁରା ଏବ ଆଇଏନ୍ଏସ୍ ସାବିତ୍ରୀ ୪୦ ଟନ୍ ମାନବୀୟ ସହାୟତା ନେଇ ମ୍ୟାନ୍ମାରର ୟାଙ୍ଗୁନ୍ ବନ୍ଦର ଅଭିମୁଖେ ଯାତ୍ରା କରିଥିବା ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର କହିଛନ୍ତି।
