ମନେପଡେ ପରମାଣୁ ଆକ୍ରମଣର ଧ୍ବଂସକାରୀ ଦିନ
ଆଜି ସମଗ୍ର ବିଶ୍ବ ପାଳୁଛି ‘ନାଗାସାକି ଦିବସ’ । ୧୯୪୫ ଅଗଷ୍ଟ ୯ ତାରିଖରେ ଜାପାନର ନାଗାସାକି ସହର ଉପରେ ଆମେରିକା ପକାଇଥିବା ପରମାଣୁ ବୋମାର ଭୟଙ୍କର ପରିଣାମକୁ ସ୍ମରଣ ଉଦ୍ଦ୍ୟେଶରେ ଏହି ଦିବସ ଉତ୍ସର୍ଗୀକୃତ । ଦ୍ବିତୀୟ ବିଶ୍ବଯୁଦ୍ଧ ଅବସରରେ ୧୯୪୫ ଅଗଷ୍ଟ ୬ ତାରିଖରେ ଜାପାନର ହିରୋସିମା ଉପରେ ଆମେରିକା ତାହାର ପ୍ରଥମ ପରମାଣୁ ବୋମା ‘ଲିଟିଲ୍ ବୟ’ ନିକ୍ଷେପ କରିଥିଲା। ଏହା ସତ୍ତ୍ବେ ଜାପାନ ମିତ୍ରଶକ୍ତି ପାଖରେ ଆତ୍ମସମର୍ପଣ ନ କରିବାରୁ ୩ ଦିନ ପରେ ଜାପାନର ଅଗ୍ରଣୀ ଶିଳ୍ପ ସହର ନାଗାସାକି ଉପରେ ଆମେରିକା ଦ୍ୱିତୀୟ ପରମାଣୁ ବୋମା ‘ଫ୍ୟାଟ୍ ମ୍ୟାନ୍’ ପକାଇଥିଲା । ସେହି ବୋମା ବିସ୍ଫୋରଣର ତେଜସ୍କ୍ରିୟ ବିକିରଣ ଯୋଗୁଁ ୭୪,୦୦୦ରୁ ୮୦,୦୦୦ ନାଗରିକ ପ୍ରାଣ ହରାଇଥିଲେ। ଏହି ଭୟଙ୍କର ବିନାଶ ଦେଖି ଜାପାନ ଶେଷରେ ମୁଣ୍ଡ ନୁଆଁଇଥିଲା । ଅଗଷ୍ଟ ୧୫ ତାରିଖରେ ଜାପାନ ସର୍ତ୍ତହୀନ ଅତ୍ମସମର୍ପଣ ଘୋଷଣା କରିବା ପରେ ଦ୍ୱିତୀୟ ବିଶ୍ୱଯୁଦ୍ଧର ଅବସାନ ଘଟିଥିଲା । ନାଗାସାକି ଦିବସ ପରମାଣୁ ଅସ୍ତ୍ରଶସ୍ତ୍ରର ଧ୍ୱଂସକାରୀ ପରିଣାମ ସମ୍ପର୍କରେ ମଣିଷକୁ ଚେତାଇଦେବା ସହିତ ବିନାଶକାରୀ ଅସ୍ତ୍ରଶସ୍ତ୍ରରୁ ବିଶ୍ୱକୁ ମୁକ୍ତ ରଖିବାକୁ ଆହ୍ୱାନ ଦିଏ ।
