ଜୀବନ୍ତ ଜଳିଗଲେ ୧୧ଜଣ
ପାକିସ୍ତାନର କରାଚୀରେ ବହୁତଳବିଶିଷ୍ଟ ଏକ ସପିଙ୍ଗ୍ ମଲ୍ରେ ଭୟଙ୍କର ଅଗ୍ନିକାଣ୍ଡ । ଏହି ଘଟଣାରେ ୧୧ଜଣ ଲୋକ ଜୀବନ୍ତ ଦଗ୍ଧ ହୋଇଛନ୍ତି । ଏଥିସହ ଅନେକ ଜ୍ବଳନ୍ତ ମଲ୍ରେ ଫସି ରହିଥିବା ଆଶଙ୍କା କରାଯାଉଛି । କରାଚୀର ରଶିଦ୍ ମିନ୍ହାସ୍ ରୋଡ୍ରେ ଥିବା ‘ଆର୍.ଜେ. ସପିଙ୍ଗ୍ ମଲ୍’ରେ ସକାଳୁ ଏହି ଅଗ୍ନିକାଣ୍ଡ ଘଟିଥିଲା । ଦମକଳ ବାହିନୀ ପ୍ରାୟ ୫୦ ଜଣଙ୍କୁ ଉଦ୍ଧାର କରିଛି, କିନ୍ତୁ ଆହୁରି ଅନେକ ଲୋକ ମଲ୍ ଭିତରେ ଫସି ରହିଛନ୍ତି । ସେମାନଙ୍କୁ ନିରାପଦ ସ୍ଥାନକୁ ଆଣିବା ଲାଗି ପ୍ରୟାସ ଜାରି ରହିଥିବା କଥା ସରକାରୀ ଅଧିକାରୀମାନେ କହିଛନ୍ତି । ନିଆଁ ବ୍ୟାପିବା ବେଳେ ସମସ୍ତେ ‘ସେଫ୍ ରୁମ୍’ ଆଡ଼କୁ ଧାଇଁ ଯାଇ ଜୀବନ ବଞ୍ଚାଇଲୁ ବୋଲି ଉଦ୍ଧାର ପରେ କିଛି ବ୍ୟକ୍ତି ମତ ପ୍ରକାଶ କରିଥିଲେ । ଏଥିସହ ସେ ଆହୁରି ମଧ୍ୟ କହିଛନ୍ତି ଏତେ ବହଳ ଧୂଆଁ ଉଠୁଥିଲା ଯେ, କ’ଣ କୁଆଡ଼େ ହେଉଛି ଆମେ ଜାଣି ପାରୁ ନ ଥିଲୁ । ମୃତ୍ୟୁସଂଖ୍ୟା ବିଷୟରେ କରାଚୀ ମେୟର୍ ମୁର୍ତାଜ୍ ୱାହାବ୍ ‘ଏକ୍ସ୍’ କରି ସୁନିଶ୍ଚିତ କରିଛନ୍ତି । ନିଆଁ ଲାଗିବାର କାରଣ ଏପର୍ଯ୍ୟନ୍ତ ଜଣାପଡ଼ିନାହିଁ । ଅଗ୍ନିକାଣ୍ଡରେ ଆହତ ହୋଇଥିବା କେତେ ଜଣ ଲୋକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି ।
