ଜ୍ଞାନବ୍ୟାପୀ ଗର୍ଭଗୃହରେ ପୂଜା-ପାଠ କରିବାକୁ ହିନ୍ଦୁଙ୍କୁ ମିଳିଲା ଅନୁମତି
ଜ୍ଞାନବ୍ୟାପୀ ମାମଲାରେ ହିନ୍ଦୁପକ୍ଷଙ୍କ ବଡ଼ ବିଜୟ । ଗର୍ଭଗୃହରେ ପୂଜା-ପାଠ କରିବାକୁ ମିଳିଲା ଅନୁମତି । ୧୯୯୩ରୁ ବନ୍ଦ ଥିଲା ପୂଜାର୍ଚ୍ଚନା । କିଛି ଦିନ ପୂର୍ବରୁ ଜ୍ଞାନବ୍ୟାପୀ ପରିସରରେ ହିନ୍ଦୁ ମନ୍ଦିର ଥିବା ଜଣାପଡିଥିଲା । ଆଜି ଜ୍ଞାନବ୍ୟାପୀ ମାମଲାରେ ବାରଣାସୀର ଜିଲ୍ଲା କୋର୍ଟ ହିନ୍ଦୁ ପକ୍ଷଙ୍କ ସମର୍ଥନରେ ବଡ଼ ରାୟ ଦେଇଛନ୍ତି । ଜ୍ଞାନବ୍ୟାପୀର ବ୍ୟାସ ତହଖାନାରେ ହିନ୍ଦୁ ପକ୍ଷଙ୍କୁ ପୂଜା କରିବାକୁ ଅନୁମତି ଦେଇଛନ୍ତି କୋର୍ଟ । ଏହି ତହଖାନା ମସଜିଦର ତଳେ ଅଛି । ପୂଜା ପାଇଁ ୭ ଦିନ ମଧ୍ୟରେ ବ୍ୟାରିକେଡିଂ ବ୍ୟବସ୍ଥା କରିବାକୁ କୋର୍ଟ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ଏବେ ଏଠାରେ ନିୟମିତ ଭାବେ ପୂଜାର୍ଚ୍ଚନା ହେବ । କାଶୀ ବିଶ୍ୱନାଥ ଟ୍ରଷ୍ଟ ପକ୍ଷରୁ ଏହି ପୂଜାର୍ଚ୍ଚନା କରାଯିବ । ହିନ୍ଦୁପକ୍ଷ ଏହାକୁ ବଡ଼ ବିଜୟ ଓ ୩୦ ବର୍ଷ ପରେ ଏହି ବିଜୟ ମିଳିଛି ବୋଲି କହିଛନ୍ତି । ତେବେ ୧୯୯୩ ମସିହା ଯାଏଁ ଏହି ସ୍ଥାନରେ ପୂଜାର୍ଚ୍ଚନା ଚାଲିଥିଲା । ବାରଣାସୀର ଜ୍ଞାନବ୍ୟାପୀ ପରିସରରେ ଥିବା ବ୍ୟାସ ତହଖାନାରେ ପୂଜା ପାଠ କରିବା ପାଇଁ ଅନୁମତି ଦେବାକୁ ଶୈଳେନ୍ଦ୍ର କୁମାର ପାଠକ ନାମକ ଜଣେ ବ୍ୟକ୍ତି ଆବେଦନ କରିଥିଲେ । ଏହାର ଶୁଣାଣି କରି ବାରଣାସୀ ଜିଲ୍ଲା କୋର୍ଟ ଗତକାଲି ରାୟକୁ ସଂରକ୍ଷିତ ରଖିଥିଲେ, ଯାହାର ରାୟ ଆଜି ଆସିଛି । ବ୍ୟାସ ପରିବାର ଏହି ପୂଜାର୍ଚ୍ଚନା କରିବେ । ସୋମନାଥ ବ୍ୟାସଙ୍କ ପରିବାର ୧୯୯୩ ଯାଏଁ ତହଖାନାରେ ପୂଜାର୍ଚ୍ଚନା କରୁଥିଲେ । ୧୯୯୩ ପରେ ତତକାଳୀନ ରାଜ୍ୟ ସରକାରଙ୍କ ନିର୍ଦ୍ଦେଶରେ ତହଖାନାରେ ପୂଜା ବନ୍ଦ ହୋଇଯାଇଥିଲା । ଏହାପରେ ତହଖାନାକୁ ନିଜ ଅଧିନକୁ ନେଇଥିଲେ ୟୁପି ସରକାର । ଏଏସଆଇ ସର୍ଭେ କରିବା ସମୟରେ ତହଖାନାର ସଫା-ସୁତରା କରାଯାଇଥିଲା । ଏବଂ ଜ୍ଞାନବ୍ୟାପୀ ପରିସରରେ ହିନ୍ଦୁ ମନ୍ଦିର ଥିବା ଏଏସଆଇ ସର୍ଭେରୁ ଜଣାପଡ଼ିଥିଲା ।
