ରାଜ୍ୟପାଳଙ୍କ ବିରୋଧରେ ରାଷ୍ଟ୍ରପତିଙ୍କୁ ଅଭିଯୋଗ
ରାଜ୍ୟପାଳଙ୍କ ବିରୋଧରେ ରାଷ୍ଟ୍ରପତିଙ୍କୁ ଅଭିଯୋଗ କଲେ ତାମିଲନାଡ଼ୁ ମୁଖ୍ୟମନ୍ତ୍ରୀ ଏମ୍କେ ଷ୍ଟାଲିନ୍। ତାମିଲନାଡ଼ୁର ରାଜ୍ୟପାଳ ଆରଏନ୍ ରବିଙ୍କ ବିରୋଧରେ ସେ ଅଭିଯୋଗ ଆଣିଥିବା ରାଜ୍ୟ ସରକାରଙ୍କ ପକ୍ଷରୁ ସୂଚନା ଦିଆଯାଇଛି । ରାଜ୍ୟପାଳଙ୍କ ବିରୋଧରେ ସେ ସରକାରୀ ନୀତି, ନିୟମ ଉଲ୍ଲଂଘନର ଅଭିଯୋଗ ଆଣିଛନ୍ତି। ଏଥିସହ ରାଜ୍ୟପାଳ ପଦରୁ ଆରଏନ୍ ରବିଙ୍କୁ ହଟାଇବାକୁ ସେ ରାଷ୍ଟ୍ରପତିଙ୍କୁ ନିବେଦନ କରିଛନ୍ତି। ରାଜ୍ୟର ଲୋକ, ସେମାନଙ୍କ ହିତ ଓ ସମ୍ୱିଧାନ ବିରୋଧରେ ଆରଏନ୍ ରବି କାମ କରିଥିବା ଷ୍ଟାଲିନ୍ ଅଭିଯୋଗ କରିଛନ୍ତି। ସେ ଅଭିଯୋଗ କରିଛନ୍ତି, ଗିରଫ ହୋଇଥିବା ମନ୍ତ୍ରୀ ଏସ୍ ବାଲାଜୀଙ୍କୁ ବରଖାସ୍ତ କରିବା ଓ ଏହି ନିର୍ଣ୍ଣୟର କିଛି ଘଣ୍ଟା ପରେ ଏହାକୁ ରଦ୍ଦ କରି ରାଜ୍ୟପାଳ ନିୟମ ଭାଙ୍ଗିଛନ୍ତି। ମନ୍ତ୍ରୀ ନିଯୁକ୍ତି ଓ ନିର୍ଣ୍ଣୟ ମୁଖ୍ୟମନ୍ତ୍ରୀଙ୍କ ବିଶେଷ ଅଧିକାର, ଏହା ରାଜ୍ୟପାଳଙ୍କର ନୁହେଁ।
