ନାମାଙ୍କନ ଭରିଲେ ରାହୁଲ ଗାନ୍ଧି
ରାୟବରେଲୀ ଆସନରୁ ନାମାଙ୍କନ ଭରିଲେ ରାହୁଲ ଗାନ୍ଧି । ବିଶାଳ ଶୋଭାଯାତ୍ରାରେ ଆସି ନାମାଙ୍କନ ଦାଖଲ କରିଛନ୍ତି । ନାମାଙ୍କନ ବେଳେ ସୋନିଆ ଗାନ୍ଧୀ, ପ୍ରିୟଙ୍କା ଗାନ୍ଧୀ ଓ ଅଶୋକ ଗେହଲଟ ଉପସ୍ଥିତ ଥିଲେ । ରାୟବରେଲୀରୁ ନାଁ ଘୋଷଣା ହେବା ପରେ ସ୍ୱତନ୍ତ୍ର ବିମାନରେ ଆସି ରାୟବରେଲୀ ସ୍ଥିତ ଫୁରସତଗଞ୍ଜ ବିମାନବନ୍ଦରରେ ପହଞ୍ଚିଥିଲେ । ତାଙ୍କ ସହ ସୋନିଆ ଗାନ୍ଧୀ, ଭଉଣୀ ପ୍ରିୟଙ୍କା ଗାନ୍ଧୀ ଓ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲଟ, ପାର୍ଟି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଓ ଅନ୍ୟ କିଛି ନେତା ରହିଥିଲେ । ବିମାନରୁ ରାହୁଲ ଗାନ୍ଧୀ ଓହ୍ଲାଇବା ପରେ ହଜାର ହଜାର ଦଳୀୟ କର୍ମୀ ଓ ସମର୍ଥକ ତାଙ୍କୁ ସ୍ୱାଗତ କରି ଉପ ଜିଲ୍ଲାପାଳଙ୍କ କାର୍ୟ୍ୟାଳୟ ପର୍ୟ୍ୟନ୍ତ ନେଇଥିଲେ । ତାଙ୍କ ନାମାଙ୍କନ ଶୋଭାଯାତ୍ରାରେ ସମର୍ଥକଙ୍କର ପ୍ରବଳ ଭିଡ ଲାଗିଥିଲା । ଅନେକ ଦିନ ଧରି ଲାଗିଥିବା ସସ୍ପେନ୍ସର ଅବସାନ କରି ଶୁକ୍ରବାର ଦିନ ରାହୁଲ ଗାନ୍ଧୀ ରାୟବରେଲୀ ଲୋକସଭା ଆସନରୁ ନାମାଙ୍କନ ଭରିଛନ୍ତି । ଏହା ପୂର୍ବରୁ ସୋନିଆ ଗାନ୍ଧୀଙ୍କ ନିର୍ବାଚନ କ୍ଷେତ୍ର ରହିଥିଲା । ରାୟବରେଲୀ ଲୋକସଭା ଆସନ ପାଇଁ ମେ’୨୦ ତାରିଖରେ ଭୋଟ ଗ୍ରହଣ ହେବ । ସେପଟେ ଆମେଠୀରୁ ସ୍ମୃତି ଇରାନୀଙ୍କ ବିପକ୍ଷରେ କଂଗ୍ରେସରୁ କିଶୋରୀ ଲାଲ ଶର୍ମା ନାମାଙ୍କନ ଭରିଛନ୍ତି । ତାଙ୍କ ନାମାଙ୍କନ ବେଳେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଉପସ୍ଥିତ ଥିଲେ ।
