ରାହୁଲ ଗାନ୍ଧୀଙ୍କ ଘୋଷଣା, କଂଗ୍ରେସ ଶାସିତ ରାଜ୍ୟରେ ଜାତିଗତ ଜନଗଣନା

ଜାତିଗତ ଜନଗଣନାକୁ କଂଗ୍ରେସର ହଁ

ବିହାର ଜନଗଣନା ରିପୋର୍ଟ ସାମ୍ନାକୁ ଆସିବା ପରେ ସାରା ଦେଶରେ ଏହାକୁ ନେଇ ରାଜନୀତି ଆରମ୍ଭ ହୋଇଛି । ଏହାରି ଭିତରେ କଂଗ୍ରେସ ଶାସିତ ସମସ୍ତ ରାଜ୍ୟରେ ଜାତିଗତ ଜନଗଣନା ହେବ ବୋଲି ଘୋଷଣା କରିଛନ୍ତି କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧି । ସିଡବ୍ଲୁସିର ବୈଠକରେ ଐତିହାସିକ ନିଷ୍ପତି ନିଯାଇଛି ଯେ କଂଗ୍ରେସ ଶାସିତ ସମସ୍ତ ରାଜ୍ୟରେ ଜାତିଗତ ଜନଗଣନା କରାଯିବ । ରାହୁଲ ଗାନ୍ଧି କହିଛନ୍ତି ଯେ, ଜାତିଗତ ଜନଗଣନାର ଐତିହାସିକ ନିଷ୍ପତ୍ତି ସର୍ବସମ୍ମତି କ୍ରମେ ନିଆଯାଇଛି । କଂଗ୍ରେସ ଶାସିତ ରାଜ୍ୟର ସମସ୍ତ ମୁଖ୍ୟମନ୍ତ୍ରୀମାନେ ନିଷ୍ପତ୍ତି ନେଇଛନ୍ତି ଯେ ସେମାନେ ହିମାଚଳପ୍ରଦେଶ, ରାଜସ୍ଥାନ, କର୍ଣ୍ଣାଟକ ଏବଂ ଛତିଶଗଡ଼ରେ ଜାତିଗତ ଜନଗଣନା କରାଇବେ । ଏହି ସମ୍ବନ୍ଧରେ ଏକ ପ୍ରସ୍ତାବ ପାରିତ କରାଯାଇଛି । ସେ କହିଛନ୍ତି, ସମ୍ପୂର୍ଣ୍ଣ କଂଗ୍ରେସ ଦଳ ଏହି ନିଷ୍ପତ୍ତି ନେଇଛି । ଇଣ୍ଡିଆ ମେଣ୍ଟର ଅଧିକତମ ଦଳ ମଧ୍ୟ ଜାତିଗତ ଜନଗଣନା ଉପରେ ସହମତି ପ୍ରକାଶ କରିଛନ୍ତି । ରାହୁଲ ଆଗକୁ କହିଛନ୍ତି ଏହା ଧର୍ମ ବା ଜାତି ସମ୍ପର୍କରେ ନୁହେଁ । ଏହି ଜାତିଗତ ଜନଗଣନା ଗରିବ ଲୋକମାନଙ୍କ ପାଇଁ ଅଟେ ।