ବାଇକ୍ ରେ ଲଦାଖ୍ ବୁଲି ଇଚ୍ଛା ପୂରଣ କଲେ ରାହୁଲ ଗାନ୍ଧୀ
କିଛିଦିନ ତଳେ ଜଣେ ମେକାନିକ୍ କୁ କହୁ କହୁ ମନର କଥା କହିଥିଲେ କଂଗ୍ରେସ ସାଂସଦ ରାହୁଲ ଗାନ୍ଧୀ । ସେ କହିଥିଲେ ବାଇକ୍ ଚଲାଇ ବୁଲି ଯିବାକୁ ତାଙ୍କର ବହୁତ ଇଚ୍ଛା ଅଛି ହେଲେ ସେ ଏହାକୁ ପୂରଣ କରିପାରୁନାହାନ୍ତି । ମାତ୍ର ଏବେ କିନ୍ତୁ ରାହୁଲଙ୍କ ଏହି ଇଚ୍ଛା ପୂରଣ ହୋଇଥିବା ଦେଖିବାକୁ ମିଳିଛି । ବାଇକରେ ବୁଲିବାକୁ ବାହାରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ପ୍ରଥମ ଲଦାଖ ଗସ୍ତରେ ଅଛନ୍ତି ରାହୁଲ । କେଟିଏମ ବାଇକ ସହ ହେଲମେଟ ପିନ୍ଧିଥିବା ଲୁକରେ ନଜର ଆସିଛନ୍ତି ରାହୁଲ । ଯାହାର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ‘ଇନ୍ଷ୍ଟାଗ୍ରାମ୍ ଆକାଉଣ୍ଟ୍’ରେ ଫଟୋ ସେୟାର୍ କରି ରାହୁଲ୍ ଲେଖିଛନ୍ତି, ପାଙ୍ଗୋଙ୍ଗ୍ ହ୍ରଦ ଅଭିମୁଖେ ଯିବା ରାସ୍ତାରେ । ମୋ ବାପା କହୁଥିଲେ ଏହା ହେଉଛି ବିଶ୍ବର ସବୁଠୁ ସୁନ୍ଦର ସ୍ଥାନମାନଙ୍କ ମଧ୍ୟରୁ ଗୋଟିଏ। ପାଙ୍ଗୋଙ୍ଗ୍ ହ୍ରଦ ନିକଟରେ ଅଗଷ୍ଟ ୨୦ ତାରିଖ ଦିନ ରାହୁଲ୍ ଗାନ୍ଧୀ ତାଙ୍କ ପିତା ରାଜୀବ ଗାନ୍ଧୀଙ୍କ ଜନ୍ମଦିନ ଅବସରରେ ପୂଜାର୍ଚ୍ଚନା କରିବେ। ସେହିପରି, ରାହୁଲ୍ ଗାନ୍ଧୀ ଲଦାଖରେ ଯୁବ କଂଗ୍ରେସ ନେତା ଓ କର୍ମୀମାନଙ୍କ ସହିତ ଆଲୋଚନା କରିଥିଲେ। ପରେ ରାହୁଲ୍ ସେ ଜିଲ୍ଲାରେ ଆୟୋଜିତ ଫୁଟ୍ବଲ୍ ମ୍ୟାଚ୍ ମଧ୍ୟ ଦେଖିଥିଲେ।
