ବଦଳିବ ସରକାର, ନୂଆ ମୁଖ୍ୟମନ୍ତ୍ରୀ ପାଇବ ମିଜୋରାମ
ବଦଳିବ ସରକାର, ନୂଆ ମୁଖ୍ୟମନ୍ତ୍ରୀ ପାଇବ ମିଜୋରାମ। ୪୦ ବିଧାନସଭା ଆସନରୁ ୨୭ରୁ ଅଧିକ ଆସନରେ ଜେଡପିଏମ୍ ବା ଜୋରାମ ପିପୁଲ ମୁଭମେଂଟ ଆଗରେ ରହିଛି। ଏମଏନଏଫ ୧୦ଟି ଆସନରେ ଆଗୁଆ ରହିଛି । ସେହିପରି ବିଜେପି ୨ଟି ଆସନରେ ଏବଂ କଂଗ୍ରେସ ଗୋଟିଏ ଆସନରେ ଆଗୁଆ ରହିଛି । ମିଜୋରାମରେ ସରକାର ଗଢିବାକୁ ଯାଉଛି ଜେଡପିଏମ । ଏବଂ ଲାଲଦୁହୋମା ମିଜୋରାମର ନୂଆ ମୁଖ୍ୟମନ୍ତ୍ରୀ ହେବା ଏକପ୍ରକାର ସ୍ପଷ୍ଟ ହୋଇଛି । ଜଣେ ପ୍ରଶାସନିକ ଅଧିକାରୀରୁ ରାଜ୍ୟର ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ଲାଲଦୁହୋମା । ଲାଲଦୁହୋମା ମିଜୋରାମର ଯୁବବର୍ଗଙ୍କ ଭିତରେ ଜଣେ ପରିଚିତ ନାମ । ଗତ କିଛି ବର୍ଷ ଧରି ସେ ମିଜୋରାମର ବିକାଶ ପାଇଁ ରାଜ୍ୟକୁ କଂଗ୍ରେସ ଏବଂ ଏମଏନଏଫ କବଳରୁ ମୁକ୍ତି କରିବାକୁ ନାରା ଦେଇଥିଲେ । ଲାଲଦୁହୋମା ୧୯୭୭ ମସିହାରେ ଆଇପିଏସ୍ ଭାବେ ଗୋଆରେ ନିଯୁକ୍ତ ହେଇଥିଲେ । ସେଠାରେ ସେ ଜଣେ ସ୍କ୍ୱାର୍ଡ ଲିଡର ଭାବେ କାମ କରିଥିଲେ । ତେବେ ଏହି ସମୟରେ ସେ ବିଭିନ୍ନ ତସ୍କରୀ ଉପରେ ଛାପା ମାରିବା ସହିତ କଡା କାର୍ଯ୍ୟାନୁଷ୍ଠାନ ନେଇଥିଲେ। ଏହାପରେ ତାଙ୍କ କାମକୁ ଦେଖି ୧୯୮୨ ମସିହାରେ ତାଙ୍କୁ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରାଗାନ୍ଧୀଙ୍କ ସୁରକ୍ଷା ପ୍ରଭାରୀ ଭାବେ ଦାୟିତ୍ୱ ଦିଆଯାଇଥିଲା । ଇନ୍ଦିରା ଗାନ୍ଧୀଙ୍କ ସୁରକ୍ଷା ଦାୟିତ୍ୱରେ ୨ ବର୍ଷ ରହିବା ପରେ ଲାଲଦୁହୋମା ରାଜନୀତିରେ ପ୍ରବେଶ କରିଥିଲେ। ଆଉ ୧୯୮୪ ମସିହାରେ ସେ ସାଂସଦ ଭାବେ ନିର୍ବାଚିତ ହେଇଥିଲେ । ତେବେ ଏହାର ୪ ବର୍ଷ ପରେ ସେ କଂଗ୍ରେସରୁ ଇସ୍ତଫା ଦେଇଥିଲେ । ତାଙ୍କୁ ଲୋକସଭାରୁ ମଧ୍ୟ ଅଯୋଗ୍ୟ କରିଦିଆଯାଇଥିଲା । କଂଗ୍ରେସ ଛାଡିବା ପରେ ଲାଲଦୁହୋମା ଜୋରାମ ନ୍ୟାସନାଲିଷ୍ଟ୍ ପାର୍ଟି ଗଠନ କରିଥିଲେ । ଏହାପରେ ୨୦୧୮ ବିଧାନସଭା ନିର୍ବାଚନରେ ସେ ବିରୋଧୀ ଦଳ ନେତା ଭାବେ କାମ କରିଥିଲେ । ହେଲେ ୨୦୨୦ ମସିହାରେ ଦଳ ବିରୋଧୀ କାନୁନର ଉଲ୍ଲଘଂନ ପାଇଁ ତାଙ୍କ ବିଧାନସଭା ସଦସ୍ୟତା ପଦ ବି ରଦ୍ଦ ହେଇଯାଇଥିଲା । ଆଉ ଏବେ ସରକାର ଗଠନ କରିବାକୁ ଜେଡପିଏମ । ଏବଂ ମିଜୋରାମର ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ଲାଲଦୁହୋମା ।
