କନ୍ନୌଜରୁ ଲଢିବେ ଅଖିଳେଶ ଯାଦବ
କନ୍ନୌଜରୁ ଲୋକସଭା ନିର୍ବାଚନ ଲଢିବେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ । ଏନେଇ ଦଳର ମହାସଚିବ ତଥା ରାଜ୍ୟସଭା ସାଂସଦ ରାମଗୋପାଳ ଯାଦବ ସୂଚନା ଦେଇଛନ୍ତି । ସେ କହିଛନ୍ତି ଯେ, ଅଖିଳେଶ ଯାଦବ କନ୍ନୌଜରୁ ହିଁ ନିର୍ବାଚନ ଲଢିବେ । ଆସନ୍ତା ଏପ୍ରିଲ ୨୫ ତାରିଖ ଦ୍ୱିପହରରେ ସେ ନାମାଙ୍କନ ଦାଖଲ କରିବେ ।ଏହାପୂର୍ବରୁ କନ୍ନୌଜ ଆସନ ପାଇଁ ସମାଜବାଦୀ ପାର୍ଟି ତେଜ ପ୍ରସାଦଙ୍କ ନାଁ ଘୋଷଣା କରିଥିଲା । ହେଲେ ତାଙ୍କ ପ୍ରାର୍ଥୀତ୍ୱକୁ ନେଇ ବିରୋଧ ହେବାରୁ ଶେଷରେ ନିଜ ପାରମ୍ପରିକ ଆସନରୁ ନିଜେ ଲଢିବା ନେଇ ଅଖିଳେଶ ନିଷ୍ପତ୍ତି ନେଇଛନ୍ତି । ତେଜପ୍ରସାଦଙ୍କୁ ପ୍ରାର୍ଥୀ କରିବା ପରେ, କନ୍ନୌଜରୁ ଏକ ୟୁନିଟ୍ ଏହାର ବିରୋଧ କରିଥିଲା । ଏପରିକି ସମାଜବାଦୀ ପାର୍ଟିର କିଛି ନେତା ଅଖିଳେଶଙ୍କୁ ଭେଟିଥିଲେ । ସେମାନେ କନ୍ନୌଜ ଆସନରୁ ଅଖିଳେଶଙ୍କ ଲଢିବା ନେଇ ଦାବି କରିଥିଲେ । ଏହାସହ ତାଙ୍କର ଅସନ୍ତୋଷ ମଧ୍ୟ ଜାହିର କରିଥିଲେ । ଆଉ ଶେଷରେ ସମର୍ଥକଙ୍କ କଥା ରଖି, ଏହି ଆସନରୁ ଲଢିବା ନେଇ ଅଖିଳେଶ ନିଷ୍ପତ୍ତି ନେଇଛନ୍ତି ।
