ଜଣେ ବିଧାୟିକା ଦୁଇଜଣ ଯୁବ ଇଞ୍ଜିନିୟରଙ୍କୁ ବିଚ୍ ରାସ୍ତାରେ ଚାପୁଡା ମାରିବା ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏଭଳି ଘଟଣା ଦେଖିବାକୁ ମିଳିଛି ମହାରାଷ୍ଟ୍ର ଥାଣେରେ । ମୀରା ଭୟାନ୍ଦରର ବିଧାୟିକା ଗୀତା ଜୈନ୍ ମ୍ୟୁନିସିପାଲ କର୍ପୋରେସନର ଯୁବ ଇଞ୍ଜିନିୟରଙ୍କୁ ଚାପୁଡା ମାରିବା ଘଟଣା ଏବେ ଚର୍ଚ୍ଚାରେ ରହିଛି । ମ୍ୟୁନିସିପାଲ କର୍ପୋରେସନର କିଛି ଇଞ୍ଜିନିୟରଙ୍କ ଉପସ୍ଥିତିରେ ସରକାରୀ ଜମି ଉପରେ ଘର ରହିଥିବା ଲୋକଙ୍କ ଘରକୁ ହଠାତ ଭଙ୍ଗାଯାଇଥିଲା । ହେଲେ ମୌସୁମୀ ବର୍ଷା ଆରମ୍ଭ ହୋଇଯାଇଥିବାବେଳେ ବାସହୀନ ଲୋକେ ଛୋଟ ପିଲାମାନଙ୍କୁ ନେଇ ରାସ୍ତା କଡରେ ଆଶ୍ରୟ ନେଇଛନ୍ତି । ଏକଥା ଜାଣିବା ମାତ୍ରେ ଦୁଇ ଯୁବ ଇଞ୍ଜିନିୟରଙ୍କୁ ଡକାଇ ଗାଲିଗୁଲଜ କରିବା ସହ ସମସ୍ତଙ୍କ ସାମ୍ନାରେ ତାଙ୍କୁ ଚାପୁଡା ମାରିଥିଲେ ବିଧାୟିକା ଗୀତା ଜୈନ୍ ଏବଂ ଦୁଇ ଇଞ୍ଜିନିୟରଙ୍କୁ ଘର ଭଙ୍ଗା ପାଇଁ ସରକାରୀ ନୋଟିସ୍ ଦେଖାଇବାକୁ ନିର୍ଦ୍ଦେଶ ଦେଇଥିଲେ । ତେବେ ଏହି ଘଟଣା ପରେ ବିଧାୟିକାଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ । ତେବେ ଯୁବ ଇଞ୍ଜିନିୟରଙ୍କୁ ବିଧାୟିକା ଚାପୁଡା ମାରିବା ଓ ଗାଳିଦେବା ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
