୪ଘଣ୍ଟା ପରେ ନିଆଁକୁ ଆୟତ୍ତ କଲା ଅଗ୍ନିଶମ ବିଭାଗ
କଟକରେ ଭୟଙ୍କର ଅଗ୍ନିକାଣ୍ଡ । ଚୌଧୁରୀ ବଜାର ସ୍ଥିତ ଏକ ଲୁଗା ଦୋକାନରେ ଅଗ୍ନିକାଣ୍ଡ ଘଟିଥିବା ଦେଖିବାକୁ ମିଳିଥିବା ବେଳେ ଲକ୍ଷାଧିକ ଟଙ୍କାର ଧନସମ୍ପତି ପୋଡ଼ି ପାଉଁଶ ହୋଇଥିବା ଦେଖିବାକୁ ମିଳିଛି । ଦମକଳ ବାହିନୀ ପହଞ୍ଚି ନିଆଁକୁ ପ୍ରାୟ ୪ଘଣ୍ଟା ପରେ ଆୟତ୍ତ କରିଥିବା ସତ୍ବେ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଛି । ସୂଚନା ଅନୁସାରେ ଚୌଧୁରୀ ବଜ଼ାର ପଢିଆରୀ ପାଠାଗାର ସମ୍ମୁଖରେ ଏକ ଲୁଗା ଦୋକାନରେ ଅଗ୍ନିକାଣ୍ଡ ହୋଇଛି । ସର୍ଟସର୍କିଟରୁ ନିଆଁ ଲାଗିଥିବା ସନ୍ଦେହ କରାଯାଉଛି । ଲାଗି ଲାଗି ଲୁଗା ଦୋକାନାଗୁଡ଼ିକ ରହିଥିବାବେଳେ ଲୋକଙ୍କ ମଧ୍ୟରେ ଭୟ ରହିଛି । ସେପଟେ ବ୍ୟବସାୟୀମାନେ ଚିନ୍ତାରେ ରହିଛନ୍ତି ।
ତେବେ ଏଭଳି ସ୍ଥାନରେ ନିଆଁ ଲାଗିଛି କି, ଲିଭାଇବା ଅଗ୍ନିଶମ ବାହିନୀ ପାଇଁ କଷ୍ଟସାଧ୍ୟ ହୋଇଯାଇଥିଲା । ପ୍ରାୟ ୪ ଘଣ୍ଟା ପରେ ୬ଟି ଅଗ୍ନିଶମ ଟିମର ୬୦ରୁ ଅଧିକ ଅଗ୍ନିଶମ କର୍ମଚାରୀଙ୍କ ଉଦ୍ୟମରେ ନିଆଁ ଆୟତ୍ତକୁ ଆସିଥିଲା । ନିଆଁ ଆୟତ୍ତକୁ ଆସିବା ପରେ ବିଲ୍ଡିଂ ଭିତରକୁ ଯାଇ ଅନୁଧ୍ୟାନ କରୁଛନ୍ତି ଅଗ୍ନିଶମ ଅଧିକାରୀ । ଭିତରେ ଆଉ କେଉଁଠି ନିଆଁ ରହିଛି କି ନାହିଁ ତାହାର ଯାଞ୍ଚ କରାଯାଉଛି । ତଳ ମହଲାରେ ପ୍ରଥମେ ନିଆଁ ଲାଗି ପରେ ଏହା ଉପର ଦୁଇ ମହଲାକୁ ବ୍ୟାପିଥିବା ଜଣାପଡିଛି । ତେବେ ଏହାକୁ ତଦନ୍ତ କରୁଛି ଅଗ୍ନିସମ ବାହିନୀ ।
