ଚନ୍ଦ୍ରପୃଷ୍ଠରେ ସୁରକ୍ଷିତ ଅବତରଣ ଉପରେ ନଜର
ଧାର୍ଯ୍ୟ କକ୍ଷପଥରେ ପହଞ୍ଚିଲା ଚନ୍ଦ୍ରଯାନ-୩ । ଏହା ବର୍ତ୍ତମାନ ପୃଥିବୀର ୧,୨୭,୬୦୯ କି.ମି X ୨୩୬ କି.ମି କକ୍ଷପଥରେ ପହଞ୍ଚିସାରିଛି । ଏହା ଟ୍ରାନ୍ସଲୁନାର ଇଞ୍ଜେକ୍ସନ ପାଇଁ ପ୍ରସ୍ତୁତ ହେଉଛି ବୋଲି ଇସ୍ରୋ ସୂଚନା ଦେଇଛି । ଅଗଷ୍ଟ ପହିଲାରେ ଧାର୍ଯ୍ୟ ହୋଇଥିବା ଟିଲଆଇ ମହାକାଶଯାନକୁ ଚନ୍ଦ୍ର ଆଡ଼କୁ ସ୍ଲିଙ୍ଗସଟ୍ କରିବ । ଏହାପରେ ଚନ୍ଦ୍ରଯାନ-୩ ଚନ୍ଦ୍ର ଯାତ୍ରା ଆରମ୍ଭ ହେବ । ଚନ୍ଦ୍ରଯାନ-୩ ସଫଳତାର ସହ ଅନ୍ତିମ ପୃଥିବୀ-ବନ୍ଧିତ କକ୍ଷପଥ ବୃଦ୍ଧି ପ୍ରକ୍ରିୟା ଜୁଲାଇ ୨୫ରେ ସମ୍ପନ୍ନ କରିଛି । ବେଙ୍ଗାଲୁରୁର ଇସ୍ରୋ ଟେଲିମେଟ୍ରି ଟ୍ରାକିଂ ଏବଂ କମାଣ୍ଡ ନେଟ୍ୱର୍କ ଦ୍ବାରା ଏହି ମାନିଉଭର୍ କରାଯାଇଥିଲା । ଚନ୍ଦ୍ରପୃଷ୍ଠରେ ସୁରକ୍ଷିତ ଅବତରଣ ଏବଂ ବୁଲିବା ଲାଗି ଯଥାସମ୍ଭବ କ୍ଷମତା ପ୍ରଦର୍ଶନ କରିବାକୁ ଚନ୍ଦ୍ରଯାନ-୩ ମିଶନ ଲକ୍ଷ୍ୟ ରଖିଛି ।
